訊息分享

想做獸醫 (Veterinarian) 唔係淨係鍾意動物就夠，一齊嚟了解下啦！

專業科目介紹 - 獸醫 (Veterinarian) 有興趣修讀獸醫嘅同學請留意，雖然而家喺香港城大有提供相關課程，但係收生名額只有十幾個，可想而知競爭將會十分激烈，所以建議同學可以同時考慮其他國家嘅大學修讀獸醫課程，例如︰澳洲及紐西蘭，依兩個國家嘅獸醫課程收生分數相對地比香港低，整個獸醫課程需時 5 至 6 年，當獲得相關學位之後，因為澳洲同紐西蘭大學所提供嘅學位都係獲得國際認證，學生只需完成相關註冊手續就可以喺香港、澳洲同紐西蘭執業。雖然收生要求無香港咁高，但係亦都唔簡單，獸醫課程要求同學必須修讀理科選修科，基本要求係最佳5科成績 21 分以上、英文基本要求 IELTS 7.0 。除咗達到學術上嘅要求之外，大學都需要知道學生係唔係熱愛動物以及有無成為獸醫嘅熱誠，所以大學要求學生曾經有照顧動物及同動物相處經驗，依度所講並唔單只係同屋企寵物相處既經驗，所以建議同學預早去動物醫院或相關既志願機構尋找工作機會。最後大學取錄學生嘅時侯都會考慮到學生對獸醫工作係唔係有充分理解，通常會透過面試、學生提交嘅個人陳述 (personal statement) 或者問卷等形式甄選合適嘅學生。如果以上條件都達到，同學亦都要有心理準備修讀課程期間將會接觸到嘅動物種類除咗香港常見嘅貓狗之外，亦會接觸到烏類、爬蟲類以及大型動物 (例如︰豬、馬、牛、羊)。

 

留言板 姓名： 電郵： 標題： 內容： 驗證碼：